Lit ik foaral net ferjitte te beneamen dat ik de earste ferzje foar de simmer klear ha wol!

Fannemiddei presintaasje, bin benijd!

De plog is behoarlik achterhelle, ha him al lang net bywurke blykt no 't ik him nochris trochsjoch!

De earste ferzje fan it 'koarte ferhaal' fan Balder is klear. It is noch net hielendal yn balâns, mar feitlik ha 'k no alle linen fan it boek fêstlein, minoftemear...

Nei lang stinnen besluten dat ik part 2, dat him ôfspilet yn it goadenryk, skriuwe sil om it tema 'geweld - geweldleasheid' hinne. Ha 'k in goed gefoel oer.
Sintrale tema fan it boek wurdt dêrtroch: hoe geane je om mei konflikten tusken folken en religys.
It boek wurdt in 'coming of age' boek oer Balder, dy 't dêryn in stânpunt ynnimme moat om 'folwoeksen' te wurden: dat kracht, selsfertrouwen en trochsettingsfermogen noadich binne om foar in 'nije', geweldleaze libbenshâlding te kiezen yn wurd en yn die.
Dat in 'goed' stânpunt gjin garânsjes jout foar in goede ôfrin blykt út syn tragyske dea, dy 't tagelikertiid it ein fan it Fryske ryk en Germaanske leauwen oankundiget.

Oerlis hân mei Babs. De raffelferzje fan part 1 en ek it ein binne sa goed as klear. Allinne part 2 moat noch. Wit noch altyd net goed hoe dat part 'yn stelling' te bringen.
Ik wol foar de presintaasje by Fryske Modernen it hiele Balder ferhaal as koart ferhaal fertelle. Liket har in goed idee. Se kin der sels spitigernôch net bywêze.

Nei wat tarieding begûn mei de 'raffelferzje', in rûge ferzje fan it boek. Bin benijd wêr't it ta liedt...

Yn oerlis mei Babs twa dingen besletten: ik meitsje in 'raffelferzje' fan it boek en ik jou in presintaasje fan de fuortgong yn 'e wurkgroep. Teksten hâld it foar mysels salang't dy noch net definityf binne.

Sy wolle graach teksten sjen, ik wit allinne net oft ik dat wol...

Se hawwe begryp foar in eventuele fertraging. Leaver sjogge is in goed resultaat, fijn!

In nije fuortgongsferslach makke foar it Fonds en opstjoerd.

Bin frege oft ik in toanieltekst meitsje wol foar in wykteaterprojekt. Kin ik eins net wegerje - wurdt goed betelle - , al betsjut it dat Balder fertraging oprinne sil...

Ik bin noch hieltyd oant sykjen nei de toan. It mei om my wol wat grimmitiger.

Mei Babs oer it 'discours' hân, siet ik wat op fêst nei nije research. Mar we bin' der út! It draait om it ynsicht dat je as yndividu - hoe graach je dat ek wolle - net altyd ynfloed ha op wat der om je hinne bard. Der binne gruttere machten en krachten (mearderheid tsjin minderheid, kracht (ek agressy) tsjin swakte (ek passiviteit)) dy 't yndividuele winsken oerspiele...

De lêste tiid in soad oanfuld by research histoaryske personaazjes, benammen oer de histoarje fan 'e Merovingers. En as resultaat dêrfan de Frankyske personaazjes fierder útwurke.

De hiel rûge ferzjes fan dielen fan haadstik 1.5, 1.6 en 1.7 op 'e plog setten foar oerlis mei Babs. Ek de prolooch is fernijd.

De ôfrûne tiid benammen wurke oan tekst en oan it fierder ynfoljen fan 'e personaazjes. Fandêr nije ynfo yn 'research personaazjes', benammen ûnder mythologyske personaazjes.

Ofrûne wike oerlis hân mei Babs oer de earste teksten. Konklúzje: sa trochgean. Ik besykje part 1 dit jier noch rûchwei klear te krijen. It giet lykwols net sa hurd as ik hope...

In nije rubryk 'downloads' makke. Hjiryn stean de teksten yn Word-opmaak. Spesjaal makke foar Babs, sadat se de teksten maklik korrizjearje kin!
Wer mei tank oan Jan.

It docht bliken dat sa'n santich prosint fan 'e minsken dy't Explorer brûke har skermresolúsje ynsteld hawwe op 1024 x 768 pixels. De plog dêroan oanpast; hy is wat lytser en kompakter wurden as er wie...

De plog is hielendal fernijd! Nije heading, nije opmaak, nije typografy. En in 'update' nei de nijste ferzje fan Rapidweaver, it programma dêr't dizze site mei makke is.
Ek de problemen mei Explorer binne oplost: it submenu wurket (troch in 'hack' yn te bouwen).
Bedankt Jan! Foar it bouwen en ferbouwen fan it tema. Wie in hiele put.
Bin benijd wat elk derfan fynt...

Babs: ik lit it noch even yn my omgean, mar ik bin net ôfwiizjend. Foar de skriuwer en de lêzer is it komplekser. Grut foardiel is datst in wat iepener (wrâld-byld) joust. Fraach is dan wol wer oft dat past by it sjenre 'goadeferhalen'. Der sitte ferskillende kanten oan, yn alle opsichten.

Ik tink om it ferhaal fan meardere perspektiven út te skriuwen, it as in soarte fan estafettte trochrinne te litten. Foardiel is datst de motiven fan oare as de haadpersonaazjes meinimme kinst en datst op meardere plakken tagelyk wêze kinst (part 2). Balder moat al haadpersoan bliuwe. Neidiel is dat it fertraagjend wurkje kin en ...? Underwerp foar petear mei Babs.

Babs: Krekt even op dyn plog west. Ik kin leau 'k noch altiten net yn it submenu komme. As ik oer de earste kolom beweech, ferskynt der net in submenu. By de ferslaggen kin ik noch altiten net komme.
Ik sil noch even neitinke oer 'it Frysk'. Hearst fan my.

Babs frege oft se no wol by it submenu fan myn plog kin. Yn dat gefal meitsje ik foar myn teksten in submenu, oars moat it ûnder elkoar yn it haadmenu.
We ha ûndertusken wol útfûn hoe't je trochlinke kinne binnen in side, mar it beswier bliuwt dat der dan enoarme lapen tekst ûnder elkoar komme...

Fraach foar Babs: Ik bin oan it skriuwen en rin toch hieltyd tsjin wurden oan wêrfan't ik (noch) net wit hoe 't ik se skriuwe sil. En om te foarkommen dat ik aanst 'de wereld' oan korreksjes dwaan moat, liket it my goed om no al te kiezen foar bepaalde skriuwwizen. Foar safier dat kin fansels. Myn fraach: soesto der oer neitinke wolle oer watsto dwaan soest? Watfoar wurden soest fuortlitte, oars skriuwe of oanpasse? Ik ha sels in tal saken op 'e plog setten ûnder 'útgongspunten: taal en wurdelist'. Liket dy dat wat?

It docht bliken dat Explorer it submenu fan 'e plog net sjen lit. Firefox docht dat wol! We sykje noch in oplossing...

Babs: ik sjoch it ferslach net stean, of doch ik wat ferkeard?
En letter: Ik folgje de ynstruksjes, mar ik krij se net. Nuver.

Ofrûne wike in petear hân mei Babs. We binne it deroer iens dat de ferhaalline fan part 1 no helder is. Ik sil dy no fierder útwurkje yn tekst.

Gjin blokkades oant no ta. Mear in kwestje fan de konsentraasje fine en tiid ôfbakenje. Ik ha ôfrûne wike noch in petear mei Babs hân. Sy hat der wol fertrouwen yn. En ik ek wol. Ha de earste opset op 'e nij (fierder) útwurke. Is no klear. Begjin it no echt út te wurkjen yn teksten. Besykje kommende moanne in grut part fan it earste diel op papier te hawwen. Ha dan ek wer in ôfspraak mei Babs pland. Moat noch even 'op stoom' komme, mar ik ha der sin oan.

Mirjam Vellinga: Hoe is it? Wol it wat mei it skriuwen? Ferline wike ha wy as begeliedingskommisje wer eefkes byinoar sitten om de stân fan saken te bepraten en wy wiene fansels benijd nei dyn foarderingen. Rinst nergens op fêst? Oars moatst it sizze hear!

Tiid hâldt gjin skoft. Nije wike in oerlis mei Babs, dan moat de útwurking fan 'e (haad)personaazjes klear wêze en leafst ek de earste koarte teksten...

Dizze wike dwaande mei personaazjebeskriuwingen. En wurke oan 'e ferhaalline. Ik réalisearre my nammentlik dat de ferhaalline fan kening Redbad helder is. Dy rint ûngefear gelyk mei de histoaryske line. It ferhaal fan Balder is lykwols noch net sa dúdlik. En hy is it haadpersonaazje! Tiid om te ynvestearjen yn it mythologyske ferhaal en plot.

In skoftke derút west. Dat hie fansels alles te krijen mei de berte fan Jolt. Mar no bin ik der wer...
De nije planning seit dat it boek ein 2007 klear wêze moat. Oan 't wurk dus!

Mirjam Vellinga: Moai dat it Fonds akkoart is en dat it mei dy en Jolt ek allegear goed is. Ik hoopje datst sels ek gau wer in bytsje op dyn âlde nivo sitst. Soest my dyn ferslachje en in kopy fan de brief fan it Fonds tastjoere wolle? Dan bin ik ek wer kompleet.
Wat de oanbieding fan Nyk syn oanbelanget: dat wie hartstikke moai. De seal siet goed fol en wy hawwe yn it foar ek aardich wat parse hân; Omrop TV en Radio (ek in reportaazje fan de oanbieding yn K-rûte), in stik yn de LC (ik stjoer dy it artikel wol eefkes ta) en dêrnei ek in goede resinsje yn de LC (sjoch op www.fryskemodernen.nl) en in artikel yn de Friesland Post.
Yntusken hat Meindert Talma ek in wurkbeurs krigen. Dat dy kin no ek oan de slach.
Sa, dan bist wer eefkes op 'e hichte.
Sukses mei alles!

Fuortgongsferslach nei it Fonds Foar de Letteren stjoerd en fuortendaliks réaksje krigen. Sy gean akkoart mei de nije plenning dy't ik nei oanlieding fan myn swangerskip makke ha.

De plog is ferhuze; op myn eigen site is mear romte beskikber

De foto's fan 'e besite oan Utrecht, Wijk bij Duurstede en omkriten steane no op 'e site

De bylden wurde te grut. En ik soe der graach noch folle mear op myn plog wolle, benammen fan gebrûksfoarwerpen. Hoewol't it in soad tiid kostet...
Mar even sjen oft Jan dêr in simpele oplossing foar betinke kin.

Moarn sil ik nei it Utrechts archyf. Sjen wat se dêr yn 'e kolleksje ha oan materiaal oer Wiltenburg. En oer it libjen yn 'e Rijndelta yn 'e iere midsieuwen. Koene se my digitaal net fertelle.
Nije wike geane we dan 2 dagen; om te strunen yn 'e omjouwing en de spoaren fan it âlde Dorestêd te sykjen...

De earste deadline is ein jannewaris, dus tiid om it earste wurk oer lokaasje en personaazjes ôf te meitsjen.

Jan Tiemersma: De plog is klear om te brûken!

Earste tekst, test

Jan Tiemersma: Kinst it tema fan 'e plog oanpasse. It is net maklik mar wol mooglik.